sunaa hai log use aaNkh bhar ke dekhate hai

sunaa hai log use aaNkh bhar ke dekhate hai 
so us ke shahar me kuchh din Thahar ke dekhate hai 

sunaa hai rabt hai us ko Kharaab haalo se 
so apane aap ko barbaad karake dekhate hai 

[rabt=closeness/relation] 

sunaa hai dard kii gaahak hai chashm-e-naazuk us kii 
so ham bhii us kii galii se guzar kar dekhate hai 

[gaahak=customer] 

sunaa hai us ko bhii hai sher-o-shaayarii se shagaf 
so ham bhii mojaze apane hunar ke dekhate hai 

[shagaf=passion] 

sunaa hai bole to baato se phuul jhaDate hai 
ye baat hai to chalo baat kar ke dekhate hai.n 

sunaa hai raat use chaa.Nd takataa rahataa hai 
sitaare baam-e-falak se utar kar dekhate hai 

sunaa hai hashr hai.n us kii Gazaal sii aaNkhe 
sunaa hai us ko hiran dasht bhar ke dekhate hai 

sunaa hai din ko use titaliyaa.N sataatii hai.n 
sunaa hai raat ko jugnuu Thahar ke dekhate hai.n 

sunaa hai raat se ba.Dh kar hai kaakul us kii 
sunaa hai shaam ko saaye guzar ke dekhate hai 

sunaa hai us kii siyaah chashmagii qayaamat hai 
so us ko surmaafarosh aaNkh bhar ke dekhate hai 

sunaa hai us ke labo se gulaab jalate hai 
so ham bahaar par ilzaam dhar ke dekhate hai.n 

sunaa hai aa_iinaa tamasaal hai jabii.n us kaa 
jo saadaa dil hai.n ban sa.Nvar ke dekhate hai.n 

sunaa hai jab se hamaa_il hai us kii gardan me 
mizaaj aur hii laal-o-gauhar ke dekhate hai 

[hamaail=something to wear around the neck] 

sunaa hai chashm-e-tasavvur se dasht-e-imkaan me 
palang zaave us kii kamar ke dekhate hai 

[zaave=angles] 

sunaa hai us ke badan ke taraash aise hai 
ke phuul apanii qabaaye katar ke dekhate hai 

vo sarv-qad hai magar be-gul-e-muraad nahii 
ke us shajar pe shaguufe samar ke dekhate hai 

[sarv-qad=tall and graceful; shaguufe=bud; samar=fruit] 

bas ek nigaah se luTataa hai qaafilaa dil kaa 
so rah_ravaan-e-tamannaa bhii Dar ke dekhate hai 

[rah_ravaa.N=travellers] 

sunaa hai us ke shabistaan se muttasil hai bahisht 
makiin udhar ke bhii jalve idhar ke dekhate hai 

[shabistan=bedroom; muttasil=near; makiin=tenant] 

ruke to gardishe us kaa tavaaf karatii hai 
chale to us ko zamaane Thahar ke dekhate hai 

kise nasiib ke be-pairahan use dekhe 
kabhii kabhii dar-o-diivaar ghar ke dekhate hai 

[be-pairahan=without clothes] 

kahaaniyaa hii sahii sab mubaalaGe hii sahii 
agar vo Khvaab hai taabiir kar ke dekhate hai 

[mubaalaGe=beyond one's limits] 

ab us ke shahar me Thahare ki kuuch kar jaaye 
'Faraz' aao sitaare safar ke dekhate hai