ab tak to nuur-o-niKhat-o-rang-o-sadaa kahuu

ab tak to nuur-o-niKhat-o-rang-o-sadaa kahuu 
main tujh ko chhuu sakuu to Khudaa jaane kyaa kahuu 

lafzo se un ko pyaar hai mafhuum se mujhe 
vo gul kahe jise main teraa naqsh-e-paa kahuu 

ab justajuu hai terii jafaa ke javaaz kii 
jii chaahataa hai tujh ko vafaa aashnaa kahuu 

sirf is ke liye ke ishq isii kaa zahuur hai 
main tere husn ko bhii sabuut-e-vafaa kahuu 

tuu chal diyaa to kitane haqaa_iq badal gaye 
najm-e-sahar ko marqad-e-shab kaa diyaa karuu

kyaa jabr hai ke but ko bhii kahanaa pa.De Khudaa 
vo hai Khudaa to mere Khudaa tujh ko kyaa kahuu.N 

jab mere muu.Nh me merii zubaa hai to kyuu.N na main 
jo kuchh kahuu yaqiin se kahuu barmalaa kahuu 

kyaa jaane kis safar pe ravaa huu azal se main 
har intahaa ko ek nai ibtidaa kahuu

ho kyuu na mujh ko apane mazaaq-e-suKhan pe naaz 
Gaalib ko kaa_inaat-e-suKhan kaa Khudaa kahuu