platform

platform bhi hai ajeeb jagah
samete har rang zindagi ka
chahe dekh le tu sharafat
ya koi nazara darindagi ka
jo leni ho zindagi ki jhalak
to aa ja...ye platform hai

railgadi aati yahan kuch aise
zindagi me koi mauka jaise
jo pakada,nayi manzil ki bahar
warna agle mauke ka intezaar
jo seekhna hai jeene ka tareeka
to aa ja....ye platform hai

chahal pahal hoti har pahar
jaise basa ho yahan koi shahar
par log yahan bhi nahi hote ekmat
platform to deta hai sabko ek chhat
jo seekhna ho samta ka paath
aa ja..ye platform hai

kisi gadi ki bheed
aur kisi se kam nahi
yahan ki bhagdaud
zindagi ki daud se kam nahi
har gadi ki taraf lagti ek daud
seedha rasta na koi mod
jo seekhna ho daudne ka tareeka
aa ja...ye platform hai

har koi yahan bheed me khoya hua
koi jaag raha koi chain se soya hua
koi hai bheed ke beech
koi hai akela yahan
koi rahta yahan sukoon se
kisi ka koi jhamela yahan
jo dekhna ho jindagi ke pahlu
aa ja ...ye platform hai

kahin hain judai ke aansu
kahin hai milan ki chamak
koi kha raha hai roti namak
kahin hai pakwan ki dhamak
dikhega jamane ka har antar
aa ja...ye platform hai

ye samete hue hai
kai shahar apne andar
sabko deta aasra
kya aadmi kya bandar
ye to sabko deta barabar ka mauka
insaan hi hai jo yahan bhi karta dhokha
seekha hai maine bahut kuch isse
aa ja...ye platform hai


"ashish"