is qadar musal_sal thii shiddate judaaii kii

is qadar musal_sal thii shiddate judaaii kii 
aaj pahalii baar mai.n ne us bevafaaii kii 

[musal_sal=continuous; shiddat=severity] 

varanaa ab talak yuu thaa Khvaahisho kii baarish me 
yaa to TuuT kar royaa yaa Gazal_saraaii kii 

[Khvaahish=desire/wish] 

taj diyaa thaa kal jin ko ham ne terii chaahat me 
aaj un se majabuuran taazaa aashanaaii kii 

[taj denaa=to abandon; aashanaa_ii=love/form relationships] 

ho chalaa thaa jab mujh ko iKhtilaaf apane se 
tuune kis ghaDii zaalim merii ham_navaaii kii 

[iKhtilaaf=difference of opinion; ham-navaa_ii=friendship] 

tanz-o-taanaa-o-tohamat sab hunar hai naaseh ke 
aap se koi puuchhe ham ne kyaa buraaii kii 

[tanz=satire; taanaa=taunt; tohamat=allegation; naaseh=preacher] 

phir qafas me shor uTThaa qaidiyo kaa aur sayyaad 
dekhanaa uDaa degaa phir Khabar rihaaii kii 

[qafas=cage/prison; sayyaad=hunter]