juz tere koii bhii din raat na jaane mere

juz tere koii bhii din raat na jaane mere 
tuu kahaa hai magar ai dost puraane mere 

[juz=except] 

tuu bhii Khushbuu hai magar meraa tajassus bekaar 
barq-e-aavaaraa kii maanind Thikhaane mere 

shamaa ki lau thii ke vo tuu thaa magar hijr kii raat 
der tak rotaa rahaa koii sirhaane mere 

[sirhaane=bed-side] 

Khalq kii beKhabarii hai ke merii rusavaaii 
log mujh ko hii sunaate hai fasaane mere 

luT ke bhii Khush huu ke ashko se bharaa hai daaman 
dekh Gaarat_gare dil ye bhii Khazaane mere 

aaj ik aur baras biit gayaa us ke baGair 
jis ke hote hue hote the zamaane mere 

kaash tuu bhii merii aavaaz sunataa ho 
phir pukaare hai tujhe dil kii sadaa ne mere 

kaash tuu bhii kabhii aajaaye masiihaaii ko 
log aate hai bahut dil ko dukhaane mere 

kaash auro kii tarah mai bhii kah sakataa 
baat sun lii hai merii aaj Khudaa ne mere 

tuu hai kis haal me ai zuud_faraamosh mere 
mujh ko to chhiin liyaa ahad-e-vafaa ne mere 

chaaraagar yuu to bahut hai magar ai jaan-e-'Faraz' 
juz tere aur koii Gam na jaane mere