Khamosh ho kyo.n daad-e-jafaa kyuu.N nahii.n dete

Khamosh ho kyo daad-e-jafaa kyuu nahii dete 
bismil ho to qaatil ko duaa kyuu nahii dete 

vahashat kaa sabab ruuzan-e-zindaa to nahii hai 
mahar-o-maah-o-anjum ko bujhaa kyuu nahii dete 

ik ye bhii to andaaz-e-ilaaj-e-Gam-e-jaa hai 
ai chaaraagaro dard baDhaa kyuu nahii dete 

munsif ho agar tum to kab insaaf karoge 
mujarim hai agar ham to sazaa kyuu nahii dete 

rahazan ho to haazir hai mataa-e-dil-o-jaa bhii 
rahabar ho to manzil kaa pataa kyuu nahii dete 

kyaa biit ga_ii ab ke 'Faraz' ahal-e-chaman par 
yaaraan-e-qafas mujh ko sadaa kyuu nahii dete