jis simt bhii dekhu nazar aataa hai ke tum ho

jis simt bhii dekhuu.N nazar aataa hai ke tum ho 
ai jaan-e-jahaa.N ye ko_ii tum saa hai ke tum ho 

ye Khvaab hai Khushbuu hai ke jho.nkaa hai ke pal hai 
ye dhundh hai baadal hai ke saayaa hai ke tum ho 

is diid kii sa_aat me.n ka_ii rang hai.n larazaa.N 
mai.n huu.N ke ko_ii aur hai duniyaa hai ke tum ho 

dekho ye kisii aur kii aa.Nkhe.n hai.n ke merii 
dekhuu.N ye kisii aur kaa cheharaa hai ke tum ho 

ye umr-e-gurezaa.N kahii.n Thahare to ye jaanuu.N 
har saa.Ns me.n mujh ko ye lagataa hai ke tum ho 

har bazm me.n mauzuu-e-suKhan dil zad_gaa.N kaa 
ab kaun hai shiirii.n hai ke lailaa hai ke tum ho 

ik dard kaa phailaa huaa saharaa hai ke mai huu 
ik mauj me aayaa huaa dariya hai ke tum ho 

vo vaqt na aaye ke dil-e-zaar bhii soche 
is shahar me tanhaa koi ham saa hai ke tum ho 

aabaad ham aashuftaa saro se nahii maqtal 
ye rasm abhii shahar me zindaa hai ke tum ho 

ai jaan-e-'Faraz' itanii bhii taufiiq kise thii 
ham ko Gam-e-hastii bhii gavaaraa hai ke tum ho