kaThin hai raahguzar thoDii duur saath chalo

kaThin hai raah_guzar thoDii duur saath chalo 
bahut baDaa hai safar thoDii duur saath chaalo 

tamaam umr kahaa koii saath detaa hai 
mai jaanataa huu magar thoDii duur saath chalo 

nashe me chuur huu mai bhii tumhe bhii hosh nahii 
baDaa mazaa ho agar thoDii duur saath chalo 

ye ek shab kii mulaaqaat bhii Ganimat hai 
kise hai kal kii Khabar thoDii duur saath chalo 

abhii to jaag rahe hai chiraaG raaho ke 
abhii hai duur sahar thoDii duur saath chalo 

tavaaf-e-manzil-e-jaanaa hame bhii karanaa hai 
'Faraz' tum bhii agar thoDii duur saath chalo